فيسي-بوتيك-مون لايت-مارين

السلام عليكم ياشباب..
الموضوع هذا لمناقشة فكرة السكن في هذه الفنادق ولتسليط الضوء عليها من إيجابيات وسلبيات
لإن بعض الأخوان الكرام يوصون بشكل دائم عليها والبعض الآخر يتعرض لمشاكل ومضايقات وسرقات فيها
فياليت كل واحد يدلي بدلوه عن هذه الفنادق وأظن نادراً لأي أحد من رواد بتايا ماكان له تجربة في السكن في هذه الفنادق

خلوني أبدأ بنفسي أنا في أول سفرة وعند سؤالي عن أفضل الفنادق كانت التوصيات أغلبها بل حتى 90٪ السكن في هذه الفنادق وأنا والله العظيم لولا التوصيات ولا مافكرت ثانية أجلس في هذه الفنادق لكن كانت الفكرة عندي أن الجود من الموجود المهم عند وصولي طلبت من التكسي التوجه من المطار إلى فيسي وطبعاً الفيسي علم فوق رأسه نار كل اصحاب التكاسي يعرفونه وبالفعل اتجهنا له لكن يوم وصلنا قالوا الرسيبشن فل فأشار علي راعي التكسي التوجه لفندق بوتيك وكان وقتها توه فاتح جدييييد يلق لق وبالفعل رحنا له ولقينا غرفة لكن مايمديني أسكن ليلة إلا وألاحظ قل الحياء وسوء المعاملة والبخاشيش صبرت وتوقعت انه في كل الفنادق وزي نظام الدول العربية لكن الدعوة سمجت ولا أرتحت للوضع فنطلت عليهم أجرة ليلة وضفيت عفشي وأتجهت للمون لايت بعد توصية من أخونا القانون وسكنت في المون لايت وكان توه بعد جديد بقراطيسه وكان الوضع أوكي لكن عند الدخول والطلوع الرسيبشن يطلب بخشيش وعند السحب من السفتي بوكس بعد يطلب بخاشيش ولا حسيت بالأمان وبصراحة الفندق جوه يجيب الكتمة تقول انك ساكن في بانكوك مهو في بتايا ولاتحس في المونلايت بالأمان ناهيك عن الطريق الي يودي لي واللي تنتشر عليه محلات الجنس الثالث وعاد شف المناظر الي توسع الخاطر في الطلعة والجية ونفس الكلام ينطبق على بوتيك وس محلات الجنوس مكانه. المهم تعرفت على أخوان من أحد الدول الخليجية ويسولفون لي عن مون لايت وتجاربهم في وعن السرقات الي تصير في السوفتي بوكس ووصوني بالمغادرة منه علطول وأنا أصلاً بعد الليلة الثالثة عزمت النية لأن الفندق بصراحة ما أرتحت فيه لكن كلامهم صملني زيادة ووالله العظيم ياشباب لحظتها كنت كاره تايلند كره الله به عليم وكنت ناوي أحجز مغادرة لكن كلام الشباب غير رأيي شوي قالوا لي أطلع من المنطقة الي أنت فيها ورح لفنادق البيتش وسط أو شمال بتايا وفعلاً طلعت ورحت لفندق اسمه بابونا على الشاطئ وأخذت غرفة تطل على البحر ولحظتها عرفت الفارق الكبير جداً جداً بين السكن في المنطقة العربية وبين المناطق الثانية وعرفت ليش تايلند يسمونها بلد الإبتسامة لاشفت بخاشيش ولا شفت سوء معاملة بالعكس خدمة 10 نجوم برغم أن العاملين في الفندق قليل جداً ولا يمديهم يلحقون.ومن بعدها حرصت أشد الحرص أني ابتعد عن هذه الفنادق وكل سفرة والثانية أسمع عنها بالتحديد أشياء تخلي الواحد يتعجب ليش العالم هذه تسكن فيها طبعاً بوتيك والمونلايت يمكن جديدين شوي وفيهم شوية نظافة لكن العالم الي تسكن في الفيسي والمارين ولايهون قريس في بانكوك كيف مستحملة تسكن في هذه الأماكن؟
أنا نفسي أعرف شيء إيجابي وحيد في هذه الفنادق؟ وودي أعرف ليش بعض العالم توصي عليها؟
إذا هو على السعر ترى لو تزودها 700 بات تسكن في فندق محترم ونظيف وأمن وأمان ومعاملة خمس نجوم أثاث جديد وسيرفس على أعلى مستوى وسوفتي بوكس في الغرفة وأنترنت في الغرفة عالي السرعة

أنا والله ياجماعة أبي مصلحة الجميع ويؤلمني أني أشوف بعض الأخوان يوصون على هذه الفنادق. ولا أبي أحد من رواد بتايا الجديد يغلطون نفس غلطتي يمكن أنا ماصارت لي مشاكل قوية جداً من سرقات وعمليات إختيال لأني حريص بطبعي ولأني ماطولت في السكن في هذه الفنادق لكن ما أبغى هذا الشيء يصير في بعض الشباب الي مايعرفون نوعية هذه الفنادق.

وياليت الأخوان الي يعارضوني يذكرون لي إيجابيات هذه الفنادق من وجهة نظرهم؟
والشباب الي صارت لهم مشاكل وشافوا سلبيات فيها يذكرونها على سبيل الإستفادة..وسلامتكم